AAK kërkon veprim të institucioneve pas vendimit të Dhomave të Specializuara

Ardian Gjini kërkon që institucionet e Kosovës të angazhohen për ta kundërshtuar në Apel vendimin ndaj krerëve të UÇK-së. Kreu i AAK-së kritikoi atë që e cilësoi mungesë të veprimit institucional dhe tha se puna duhet të nisë pa vonesa.

Kryetari i Aleancës për Ardhmërinë e Kosovës, Ardian Gjini, e ka cilësuar si “brutal” vendimin e Dhomave të Specializuara ndaj krerëve të Ushtrisë Çlirimtare të Kosovës. Ai ka kërkuar që institucionet e Kosovës të angazhohen për shfrytëzimin e mundësive juridike dhe institucionale, me synimin që vendimi të korrigjohet në Apel.

Duke folur në emisionin “FIVE” të RTV Dukagjinit, Gjini tha se AAK-ja e ka mbështetur ligjin për Dhomat e Specializuara, të miratuar në Kuvendin e Kosovës, si dhe procesin në tërësi. Megjithatë, ai theksoi se partia nuk pajtohet me cilësimin e luftës së UÇK-së në vendim.

Sipas Gjinit, qëndrimi i AAK-së është se lufta çlirimtare ishte e drejtë dhe se vendimi ndaj krerëve të UÇK-së, në formën e dhënë, e dëmton Kosovën. Ai kërkoi që shteti të angazhohet në të gjitha rrugët e mundshme ligjore për ta kundërshtuar vendimin në procedurën e Apelit.

Kritika për mungesë angazhimi institucional

Gjini tha se institucionet shtetërore është dashur të merren me këtë çështje shumë më herët. Ai kritikoi mungesën e angazhimit nga Presidenca, kryeministri, Ministria e Drejtësisë dhe Ministria e Punëve të Jashtme.

Kryetari i AAK-së shprehu pasiguri nëse do të ketë angazhim të mjaftueshëm institucional pas vendimit të 16 shtatorit. Ai shtoi se, pavarësisht se Shiroka-Pula sapo ka marrë detyrën, puna për këtë çështje duhet të nisë pa vonesë.

“Do të duhej pa vonesa të niste të angazhohej për këtë çështje”, tha Gjini, duke iu referuar angazhimit të institucioneve pas vendimit të Dhomave të Specializuara.