Apeli i komuniteteve fetare: Protesta paqësore po, dhuna dhe shkatërrimi jo

Këshilli Ndërfetar i Shqipërisë u bën thirrje qytetarëve dhe institucioneve të zgjedhin dialogun dhe përgjegjësinë. Ai mbron të drejtën për protestë paqësore, por kundërshton dhunën dhe dëmtimin e pronës.

Këshilli Ndërfetar i Shqipërisë u ka bërë thirrje qytetarëve dhe institucioneve që të zgjedhin dialogun dhe përgjegjësinë, duke theksuar nevojën për paqe, drejtësi dhe respekt të ndërsjellë. Në një deklaratë, përfaqësuesit e komuniteteve fetare zyrtare thanë se shqetësimet e qytetarëve dhe studentëve duhet të dëgjohen seriozisht, ndërsa institucionet duhet të japin përgjigje konkrete, transparente dhe në përputhje me ligjin.

Këshilli thekson se paqja nuk nënkupton heshtje përballë padrejtësisë dhe se drejtësia nuk mund të ndërtohet përmes dhunës. Sipas deklaratës, autoriteti duhet ushtruar me përgjegjësi, ndërsa traditat fetare bashkohen në mbrojtjen e jetës, dinjitetit njerëzor, mëshirës dhe respektit për tjetrin.

Deklarata e cilëson protestën paqësore si një të drejtë themelore demokratike, por kundërshton dhunën, dëmtimin e pronës dhe cenimin e të drejtave të të tjerëve, pavarësisht pakënaqësisë apo qëllimit të protestuesve.

Këshilli vëren se dëmtimi i një biznesi familjar prek drejtpërdrejt jetesën e një familjeje, ndërsa cenimi i një institucioni arsimor rrezikon të drejtën për dije dhe siguri. Në deklaratë përmendet gjithashtu respektimi i përfaqësive diplomatike dhe i simboleve të tyre si pjesë e parimeve të bashkëjetesës ndërkombëtare.

Thirrje për ulje të tensioneve

Përfaqësuesit fetarë u bëjnë thirrje palëve që të shmangin akuzat dhe përplasjet, të dëgjojnë njëra-tjetrën dhe ta shohin veten si pjesë të së njëjtës shoqëri. Sipas tyre, qytetarët duhet të dëgjohen, institucionet të përgjigjen, drejtësia të garantohet dhe ligji të respektohet.

Në përfundim, Këshilli Ndërfetar u kërkon të gjitha palëve të vendosin dialogun mbi konfliktin dhe përgjegjësinë mbi përshkallëzimin. Deklarata thekson se e ardhmja e Shqipërisë duhet të ndërtohet mbi dinjitetin, besimin e ndërsjellë dhe zgjidhjet paqësore, jo mbi frikën, shkatërrimin dhe përçarjen.