AUV ndërhyn në tregun e Hasanbegut: ushqimi shitej në kushte johigjienike

Rreth dy ton ushqim u hoqën nga qarkullimi pas një kontrolli në tregun e gjelbër në lagjen Hasanbeg të Shkupit. Inspektorët konstatuan se produktet shiteshin jashtë hapësirave të caktuara dhe në kushte johigjienike.

Rreth dy ton ushqim të pasigurt u sekuestruan gjatë një kontrolli të jashtëzakonshëm në tregun e gjelbër të lagjes Hasanbeg në Shkup. Aksioni u zhvillua nga Agjencia e Ushqimit dhe Veterinarisë (AUV), në bashkëpunim me inspektoratin komunal të qytetit dhe Inspektoratin Shtetëror të Tregut.

Kontrolli synonte verifikimin e kushteve të shitjes dhe respektimin e rregullave për ruajtjen e qarkullimin e sigurt të ushqimit. Sipas AUV-së, inspektorët konstatuan se produkte të ndryshme shiteshin jashtë hapësirave të përcaktuara për këtë qëllim dhe në kushte johigjienike.

Agjencia vlerësoi se këto kushte rrisnin rrezikun për sigurinë ushqimore dhe shëndetin e konsumatorëve. Ushqimi i gjetur u sekuestrua dhe u hoq nga qarkullimi.

Shërbimet përgjegjëse të inspektimit do të vazhdojnë të ndërmarrin masa brenda kompetencave të tyre ligjore. AUV njoftoi se do të vijojë kontrollet e përforcuara, në mënyrë të pavarur dhe në bashkëpunim me institucionet përkatëse.

Agjencia u bëri thirrje operatorëve ushqimorë të respektojnë detyrimet ligjore dhe të sigurojnë kushte të përshtatshme higjienike gjatë trajtimit, ruajtjes dhe shitjes së produkteve. AUV theksoi se siguria e ushqimit dhe mbrojtja e shëndetit të konsumatorëve mbeten ndër prioritetet e saj.