Bryan Seaver mohon kërcënimet dhe përmend një mosmarrëveshje financiare

Nipi i Dolly Parton, Bryan Seaver, kundërshton kërkesën që urdhri i përkohshëm i ndalimit ndaj tij të bëhet i përhershëm. Ai mohon kërcënimet dhe thotë se konflikti lidhet me një pagesë të papaguar prej mbi 250 mijë dollarësh. Seanca pritet të mbahet më 20 tetor.

Bryan Seaver, nipi i këngëtares Dolly Parton dhe ish-shefi i saj i sigurisë, ka kundërshtuar kërkesën për ta bërë të përhershëm urdhrin e përkohshëm të ndalimit ndaj tij. Në dokumentet e paraqitura në gjykatë në Tennessee, ai mohon se ka kërcënuar kompanitë, partnerët ose punonjësit e artistes.

Seaver thotë se mesazhet e përdorura si prova nga Danny Nozell, menaxher i trashëgimisë së Parton, ishin pjesë e një bisede private mes dy miqsh. Sipas tij, ata po diskutonin në një periudhë me emocione të forta dhe mesazhet nuk përbënin kërcënim ndaj punonjësve apo bashkëpunëtorëve të këngëtares.

Mosmarrëveshja u bë publike pas vdekjes së Dolly Parton, më 25 gusht. Në fillim të shtatorit, kompania “She's Alive”, e drejtuar nga Nozell për menaxhimin dhe mbrojtjen e trashëgimisë së artistes, ndërpreu bashkëpunimin me Seaverin dhe kompaninë e tij të sigurisë. Një javë më vonë, ajo kërkoi urdhër ndalimi, duke argumentuar se sjellja e tij ishte bërë kërcënuese.

Seaver thotë se konflikti lidhet me pagesën

Seaver pranon se mesazhet drejtuar Nozellit përmbanin gjuhë të ashpër dhe vulgare, por mohon se ka frikësuar punonjësit e Herschend Family Entertainment. Ai pretendon se mosmarrëveshja lidhet me një pagesë prej më shumë se 250 mijë dollarësh për shërbimet e kompanisë së tij ndaj operatorit të Dollywood dhe hotelit Songteller.

Në një nga mesazhet e përfshira në kërkesën për urdhër, Seaver kishte thënë se do të krijonte një podkast për të dëmtuar partneritetet e markave të Partonit nëse nuk paguhej. Ai thotë se deklarata ishte e lidhur vetëm me mosmarrëveshjen financiare.

Për të kundërshtuar pretendimin se përbën rrezik, Seaver ka paraqitur një letër të vitit 2024, në të cilën Parton vlerësonte atë dhe kompaninë e tij. Seaver kishte qenë personi i zgjedhur nga këngëtarja për të njoftuar vdekjen e saj.

Të dyja palët pritet t’i paraqesin argumentet në seancën gjyqësore të 20 tetorit. Deri atëherë, urdhri i përkohshëm ia ndalon Seaverit dhe kompanisë së tij të hyjnë në pronat e “She's Alive”, të kontaktojnë punonjësit e partnerët e saj ose t’u afrohen më pak se 300 metra.