Debati për mbeturinat në Prishtinë: Pacolli kritikon Ramën dhe “Pastrimin”

Përgjegjësia për mbeturinat në Prishtinë është bërë objekt përplasjeje mes ministres Fitore Pacolli dhe udhëheqjes komunale. Pacolli kërkon shlyerjen e borxhit ndaj KMDK-së, ndërsa Komuna paralajmëron kallëzim penal lidhur me deponinë e Mirashit.

Ministrja e Mjedisit dhe Planifikimit Hapësinor, Fitore Pacolli, ia ka atribuar Komunës së Prishtinës dhe kompanisë “Pastrimi” përgjegjësinë për grumbullimin e mbeturinave në kryeqytet. Ajo ka kundërshtuar përpjekjet për t’ia bartur fajin Kompanisë për Menaxhimin e Deponive të Kosovës (KMDK).

Në një deklarim për Radio Dukagjinin, Pacolli kritikoi kryetarin e Prishtinës, Përparim Rama, dhe udhëheqjen e kompanisë “Pastrimi”. Sipas saj, ata duhet të bisedojnë me KMDK-në, të shlyejnë borxhin dhe të angazhohen për pastrimin e qytetit.

“Askush nuk mund të mbartë fajin e dështimit të Komunës, përveç kryetarit të Komunës dhe udhëheqësit të Kompanisë ‘Pastrimi’. Ata duhet të ulen të bisedojnë me KMDK-në, të paguajnë borxhin që kanë dhe të pastrojnë Prishtinën”, ka deklaruar Pacolli.

Ministrja tha se KMDK-ja ka bashkëpunuar me Komunën e Prishtinës dhe e ka lejuar shfrytëzimin e deponisë sa herë që kjo është kërkuar. Ajo rikujtoi gjithashtu se kompania “Pastrimi” ka obligime të papaguara ndaj KMDK-së.

Ndërkohë, Komuna e Prishtinës ka paralajmëruar se do të paraqesë kallëzim penal për atë që e cilëson si mbyllje të qëllimshme të deponisë së Mirashit. Drejtoria e Shërbimeve Publike ka kërkuar hapjen e deponisë dhe ka paralajmëruar veprime të tjera nëse nuk lejohet qasja.