Dhjetëra nxënës në Fushë Kosovë presin ende tekstet shkollore

Më shumë se një muaj pas fillimit të vitit shkollor, 33 nxënës në shkollën “Daut Bogujevci” në Fushë Kosovë janë ende në pritje të librave. SBASHK-u thotë se vonesa të ngjashme janë raportuar edhe në shkolla të tjera, ndërsa mungesa e teksteve mund të ndikojë në mësim.

Më shumë se një muaj pas nisjes së vitit shkollor, dhjetëra nxënës në shkollën “Daut Bogujevci” në Fushë Kosovë ende nuk janë pajisur me libra. Sekretari i shkollës, Betim Ahmeti, tha se 33 nxënës janë në pritje, ndërsa disa aplikime nuk janë konfirmuar sepse nxënësit mund të jenë të regjistruar në shkolla të tjera.

Ahmeti tha se shkolla po bashkëpunon me komunën, Drejtorinë Komunale të Arsimit dhe Ministrinë e Arsimit për të verifikuar rastet dhe për të vendosur nëse aplikimet duhet të pranohen apo të refuzohen. Ai përmendi gjithashtu vonesa në subvencionimin e mjeteve shkollore për disa nxënës.

Sipas sekretarit, ka edhe familje që i kanë marrë paratë e subvencionit, por nuk i kanë përdorur për blerjen e librave. Ai veçoi raste të nxënësve nga komunitetet, duke thënë se shkolla ka 240 nxënës nga komunitetet dhe se disa familje përballen me vështirësi sociale. Shkolla, shtoi ai, përpiqet të ndihmojë këta nxënës që të sigurojnë materialet e nevojshme.

Vonesa të raportuara edhe në shkolla të tjera

Përfaqësuesi i SBASHK-ut, Ymer Ymeri, tha se sindikata ka marrë shqetësime nga mësimdhënësit për nxënës që nuk i kanë siguruar tekstet. Sipas tij, disa prindër nuk i kanë marrë ende subvencionet për shkak të vonesave, ndërsa të tjerë i kanë marrë paratë, por nuk kanë blerë libra. Ai tha se SBASHK-u ka diskutuar me Ministrinë e Arsimit për analizimin e mënyrës së furnizimit me tekste shkollore.

Njohësi i arsimit Ismet Potera vlerësoi se mungesa e mjeteve mësimore mund të ndikojë si në gjendjen psikologjike të nxënësve, ashtu edhe në mbarëvajtjen e procesit mësimor, sidomos kur disa nxënës kanë libra e të tjerë jo.

Për të katërtin vit radhazi, Ministria e Arsimit ka vendosur të subvencionojë tekstet dhe materialet shkollore për nxënësit.