Diplomati Joshua Huck ushtron funksionet e ambasadorit amerikan në Greqi

Joshua Huck po ushtron funksionet e ambasadorit amerikan në Greqi, pas largimit të Kimberly Guilfoyle nga detyra. Diplomati ka shërbyer në disa misione dhe ka mbajtur poste të larta në Departamentin e Shtetit.

Diplomati amerikan Joshua Huck ka marrë përsipër drejtimin e Misionit të SHBA-së në Greqi, duke zëvendësuar Kimberly Guilfoyle, e cila është shkarkuar nga detyra. Huck po ushtron funksionet e ambasadorit në cilësinë e të ngarkuarit me punë në ambasadën amerikane në Athinë.

Huck ka një karrierë të gjatë në diplomacinë amerikane. Përpara detyrës së re, ai ka shërbyer në Departamentin e Shtetit dhe në përfaqësi diplomatike në vende të ndryshme të botës.

Në Uashington, ai ka qenë zëvendësndihmës sekretar i Shtetit, me përgjegjësi për politikat ndaj Evropës Jugore dhe Kaukazit. Më herët ka drejtuar Zyrën për Çështjet e Evropës Jugore, e cila mbulon Qipron, Greqinë, Maltën dhe Turqinë.

Karrierë në disa misione diplomatike

Që nga hyrja në Shërbimin Diplomatik Amerikan në vitin 2001, Huck ka shërbyer në Shangai, Tokio, Sofje, Naypyidaw, Taipei dhe Hong Kong. Në kryeqytetin amerikan, ai ka punuar gjithashtu në zyrat për çështjet e Kinës dhe të Koresë.

Sipas biografisë së tij zyrtare, Huck ka drejtuar edhe zyrën e Kurt Campbell, i cili ka shërbyer si zëvendëssekretar i Shtetit për Çështjet e Azisë Lindore dhe Paqësorit.

Huck është diplomuar në Universitetin Johns Hopkins dhe ka përfunduar studime pasuniversitare në Universitetin Ndërkombëtar të Japonisë. Ai ka marrë gjithashtu një certifikatë nga Shkolla e Studimeve të Avancuara Ndërkombëtare e Universitetit Johns Hopkins në Bolonjë.

Përzgjedhja e personit që do të drejtojë ambasadën amerikane në Athinë pritet të zgjasë disa muaj. Emërimi përfundimtar i ambasadorit kërkon vendim nga Kongresi amerikan; ratifikimi mund të bëhet në muajt e parë të vitit 2027, në një periudhë kur zgjedhjet e ndërmjetme në SHBA mund të ndikojnë në balancat politike.