Fetoshi: Kosova t’i përgjigjet vendimit të Hagës me strategji dhe argumente

Arben Fetoshi kërkon një task-forcë shtetërore për të koordinuar ekspertizën juridike, resurset dhe diplomacinë në procesin e Apelit në Hagë. Ai u bëri thirrje institucioneve që debatet për vendimin të trajtohen me argumente dhe pa cenuar partneritetet ndërkombëtare.

Drejtori i Institutit “Octopus”, Arben Fetoshi, ka kërkuar që institucionet e Kosovës ta udhëheqin përpjekjen për kundërshtimin e vendimit të Dhomave të Specializuara në Hagë ndaj krerëve të UÇK-së. Ai propozon një strategji shtetërore të koordinuar, të mbështetur në ekspertizë ligjore dhe diplomaci, pa i dëmtuar partneritetet ndërkombëtare.

Në reagimin e tij publik, Fetoshi tha se procesi i Apelit duhet të jetë në qendër të angazhimit të Kosovës. Sipas tij, përpjekjet nuk duhet të mbështeten në përshkallëzim tensionesh, polarizim politik apo përplasje me partnerët, por në mobilizimin e ekspertëve juridikë dhe të burimeve shtetërore.

Ai propozoi krijimin e një task-force për të bashkërenduar ekspertizën, resurset dhe përpjekjet diplomatike. Fetoshi shkroi se emocionet dhe akuzat duhet t’ia lënë vendin një strategjie të udhëhequr nga shteti, me synimin për të mbrojtur qëndrimin e Kosovës në arenën ndërkombëtare.

Debati publik dhe partneritetet

Fetoshi u ndal edhe te debatet që kanë pasuar vendimin e Hagës, duke i cilësuar si një sfidë për pjekurinë demokratike. Ai tha se debati është i nevojshëm, por nuk duhet të kthehet në fushata linçuese apo përndjekje për shkak të mendimit. Sipas tij, respektimi i sakrificës së veteranëve, invalidëve dhe familjeve të dëshmorëve nuk duhet të përdoret për të justifikuar veprime që dëmtojnë institucionet ose debatin demokratik.

Duke komentuar diskutimet për ndryshimet në Ligjin për Dhomat e Specializuara, Fetoshi tha se ato duhet të ndihmojnë në qartësimin e hapave të ardhshëm dhe të përgjegjësive të shtetit në procesin e Apelit. Ai argumentoi se kundërshtimi i ligjit nga Bashkimi Evropian dhe partnerët evropianë kërkon përgjigje politike, por të mbështetur në argumente dhe profesionalizëm.

Fetoshi paralajmëroi se mospajtimi me BE-në nuk nënkupton vetvetiu shkelje të marrëveshjeve, ndërsa mungesa e komunikimit mund t’i thellojë mosmarrëveshjet dhe të rrezikojë raportet me partnerët. Ai kërkoi që shqetësimet e tyre të trajtohen me maturi, duke ruajtur partneritetet strategjike të Kosovës.