Ish-zëvendësministri Ibishi: Nuk shoh rrezik për konflikt të madh në Kosovë

Ismet Ibishi thotë se nuk sheh rrezik për një luftë serioze në Kosovë, pavarësisht tensioneve me Serbinë. Ish-zëvendësministri përmendi praninë e NATO-s dhe gatishmërinë e institucioneve të sigurisë, ndërsa komentoi edhe deklaratën e Ivica Daçiqit për Prizrenin.

Ish-zëvendësministri i Punëve të Brendshme, Ismet Ibishi, vlerëson se aktualisht nuk ka rrezik për një luftë serioze në Kosovë, ndonëse Serbia dhe deklaratat e zyrtarëve të saj mbeten burim shqetësimi. Ai përmendi praninë e forcave të NATO-s dhe gatishmërinë e institucioneve të sigurisë si faktorë që, sipas tij, ndihmojnë në përballimin e situatave të mundshme.

Deklarata e Ibishit vjen pas paralajmërimit të zëvendëskryeministrit të parë dhe ministrit të Jashtëm të Kosovës, Glauk Konjufca. Në një intervistë për median hungareze Hungary Insider, Konjufca tha se ambiciet territoriale të Serbisë përbëjnë kërcënim për sovranitetin e Kosovës dhe stabilitetin rajonal.

Duke folur në emisionin “FIVE” në Dukagjin, Ibishi iu referua edhe sulmit në Banjskë. Sipas tij, atëherë kishte tendenca për përshkallëzim të konfliktit dhe marrjen e veriut të Kosovës, por institucionet e vendit ishin të përgatitura të reagonin.

Ibishi tha se Kosova ka kapacitete të sigurisë të përgatitura dhe të stërvitura për t’iu përgjigjur një konflikti të përmasave të vogla. Ai theksoi gjithashtu rolin e pranisë së NATO-s në vend, duke e përshkruar atë si përgjegjëse për sigurinë e Kosovës.

Ish-zyrtari shtoi se institucionet e rendit marrin masa shtesë kur zhvillohen zgjedhje ose ngjarje të rëndësishme, për të qenë të gatshme ndaj ndonjë tendence për përshkallëzim. Megjithatë, ai tha se nuk e sheh të mundshme një luftë serioze në Kosovë.

Komenti për deklaratën e Daçiqit

Ibishi komentoi edhe deklaratën e zëvendëskryeministrit serb Ivica Daçiq, se flamuri serb do të valojë në Prizren. Ai e cilësoi këtë si retorikë politike para zgjedhjeve në Serbi dhe tha se pretendimi i tillë mbetet dëshirë e politikanëve serbë.

“Një gjë e tillë nuk do të ndodhë kurrë”, u shpreh Ibishi.