Ismaili dhe Francken diskutojnë reformat në infrastrukturën e pagesave

Kosova po synon të modernizojë infrastrukturën e pagesave dhe të avancojë integrimin në SEPA. Këto tema u diskutuan nga guvernatori i BQK-së, Ahmet Ismaili, dhe përfaqësuesja e Bankës Botërore, Nathalie Francken.

Modernizimi i infrastrukturës së pagesave dhe afrimi i Kosovës me sistemet financiare evropiane ishin në fokus të takimit mes guvernatorit të Bankës Qendrore të Kosovës, Ahmet Ismaili, dhe drejtoreshës ekzekutive të Konstituencës së Grupit të Bankës Botërore, Nathalie Francken.

Takimi u zhvillua në kuadër të Takimeve Vjetore 2026 të Fondit Monetar Ndërkombëtar dhe Grupit të Bankës Botërore. Sipas njoftimit të BQK-së, palët diskutuan avancimin e bashkëpunimit dhe zbatimin e projekteve strategjike.

Në mesin e temave ishte modernizimi i infrastrukturës së pagesave, zhvillimi i një sistemi të pagesave të shpejta, i njohur si TIPS Clone, si dhe integrimi i Kosovës në Zonën e Vetme të Pagesave në Euro (SEPA).

Ismaili theksoi se reformat synojnë të rrisin efikasitetin dhe sigurinë e pagesave, si dhe të ulin kostot për qytetarët dhe bizneset. Ai vuri në pah edhe rëndësinë e forcimit të lidhjeve të Kosovës me sistemet financiare evropiane.

Guvernatori falënderoi Bankën Botërore për mbështetjen financiare, ekspertizën dhe asistencën teknike në realizimin e projekteve që BQK-ja i ka cilësuar si prioritare.

Francken vlerësoi progresin dhe angazhimin e bankës qendrore në zbatimin e reformave, ndërsa riafirmoi rëndësinë e vazhdimit të bashkëpunimit mes institucioneve.

BQK-ja bëri të ditur se do të vazhdojë punën për zhvillimin e një sistemi financiar modern dhe gjithëpërfshirës, në përputhje me standardet evropiane dhe në mbështetje të stabilitetit financiar e zhvillimit ekonomik të vendit.