Këshilli Prokurorial cakton datën e testit kualifikues për prokurorët e rinj

453 kandidatë do t’i nënshtrohen testit kualifikues për prokurorë të rinj më 7 nëntor. Provimi mbahet në Vushtrri, ndërsa regjistrimi përfundon në orën 12:30.

453 kandidatë që kanë plotësuar kushtet do t’i nënshtrohen testit kualifikues për prokurorë të rinj më 7 nëntor 2026. Testi do të mbahet në Akademinë e Kosovës për Siguri Publike në Vushtrri.

Njoftimi për datën dhe vendin e provimit është bërë nga Komisioni për Rekrutim të Prokurorëve të Shtetit, në kuadër të Këshillit Prokurorial të Kosovës. Bashkë me njoftimin është publikuar edhe lista e kandidatëve të kualifikuar për të marrë pjesë.

Kandidatët duhet të paraqiten për regjistrim nga ora 12:00 deri në 12:30. Pas kësaj ore dyert e sallës do të mbyllen dhe personat që mbërrijnë me vonesë nuk do të lejohen të hyjnë në provim.

Komisioni u ka bërë thirrje kandidatëve që të kenë parasysh orarin e regjistrimit, i cili përcakton edhe hyrjen në sallën ku zhvillohet testi. Provimi është pjesë e procesit të rekrutimit për pozita të reja në Prokurorinë e Shtetit.