Konferencë në Prishtinë për bashkëpunimin kundër financave të paligjshme

Prishtina priti një konferencë rajonale për integritetin financiar në kuadër të Procesit të Berlinit. Diskutimet u përqendruan te zbatimi praktik i standardeve dhe bashkëpunimi ndërkufitar kundër financave të paligjshme.

Kosova ka organizuar konferencë rajonale për integritetin financiar dhe ndërtimin e ekonomive më të qëndrueshme, si pjesë e Procesit të Berlinit. Aktiviteti u përqendrua te zbatimi efektiv i standardeve dhe bashkëpunimi për të luftuar financat e paligjshme.

Sipas njoftimit të Ministrisë së Financave, pjesëmarrësit theksuan se përmbushja formale e standardeve dhe kërkesave ligjore nuk mjafton. Ajo duhet të shoqërohet me zbatim praktik, koordinim mes institucioneve dhe shkëmbim të informacionit.

Në diskutime u vu në pah edhe dimensioni ndërkufitar i financave të paligjshme. Përballja me këtë fenomen, thuhet në njoftim, kërkon bashkëpunim të vazhdueshëm mes vendeve të rajonit dhe partnerëve ndërkombëtarë.

Konferenca u mbajt nën temën “Përtej pajtueshmërisë: Ndërtimi i ekonomive të qëndrueshme përmes integritetit financiar”. Sipas Ministrisë, ky është aktiviteti i parë që Qeveria e Kosovës organizon në kuadër të Procesit të Berlinit dhe aktiviteti i dytë i këtij procesi që mbahet në Prishtinë gjatë këtij viti.

Përfaqësues nga Kosova, Mali i Zi dhe Gjermania

Fjalë rasti mbajtën ministri i Financave, Hekuran Murati, ambasadori i Malit të Zi në Kosovë, Bernard Çobaj, dhe zëvendësambasadorja e Gjermanisë në Kosovë, Silke Bellmann.

Çobaj përfaqësoi Malin e Zi, i cili kryeson Procesin e Berlinit këtë vit, ndërsa Bellmann përfaqësoi Gjermaninë, shtetin që nisi këtë proces. Njoftimi i Ministrisë e paraqiti konferencën si hap për nxitjen e koordinimit rajonal dhe zbatimin praktik të standardeve të integritetit financiar.