Kryetari i PSD-së vë në dyshim ligjshmërinë e projektligjit për Specialen

Dardan Molliqaj parashikon se projektligji për ndryshimet lidhur me Gjykatën Speciale do të rrëzohet në tërësi nga Gjykata Kushtetuese. Kryetari i PSD-së tha se partia e tij nuk e ka mbështetur nismën.

Kryetari i Partisë Socialdemokrate, Dardan Molliqaj, ka vlerësuar se projektligji për ndryshimet lidhur me Gjykatën Speciale nuk do të qëndrojë përballë shqyrtimit të Gjykatës Kushtetuese. Ai i bëri këto komente në emisionin “Adresa” në Kanal 10.

Molliqaj tha se, sipas tij, nisma është hartuar në një mënyrë që nuk i jep mundësi të mbijetojë në vlerësimin kushtetues. Ai parashikoi se ligji do të rrëzohet në tërësi nga Gjykata Kushtetuese, në Dhomën e Veçantë.

“Ai ligj nuk ekziston. Ai u shkru për mos me ekzistu, sepse asnjë gjasë logjike e juridike nuk e ka me mbijetu ligji”, deklaroi Molliqaj, duke shprehur bindjen e tij për rezultatin e shqyrtimit.

Kryetari i PSD-së tha gjithashtu se partia e tij nuk e ka mbështetur projektligjin. Sipas tij, PSD-ja nuk ka folur për nismën për shkak të qëndrimit që ka mbajtur ndaj saj.

“Për këtë arsye, PSD-ja për asnjë moment nuk e ka mbështet ligjin dhe s’ka fol për ligjin”, u shpreh ai. Deklaratat e Molliqajt në emision u përqendruan te vlerësimi i tij për bazën juridike të projektligjit dhe qëndrimi i PSD-së ndaj tij.