Kurorat dhe urat dentare: Halili këshillon të kursehet struktura natyrale e dhëmbit

Sa material duhet hequr nga dhëmbi para vendosjes së një kurore apo ure? Rajmonda Halili thekson se duhet ruajtur sa më shumë struktura natyrale dhe gërryerja të bëhet vetëm kur është e nevojshme. Ajo foli edhe për rolin e teknikave të ngjitjes dhe zgjedhjen e trajtimit të duhur.

Ruajtja e strukturës natyrale të dhëmbit duhet të jetë parimi kryesor gjatë vendosjes së kurorave, urave dentare dhe punimeve estetike, thotë Rajmonda Halili, specialiste e protetikës stomatologjike. Ajo thekson se gërryerja duhet të bëhet sa më pak dhe vetëm kur është e domosdoshme.

Halili foli për këtë temë në podcastin “Shëndeti në rend të parë”, ku diskutimi u përqendrua te shëndeti dhe estetika e buzëqeshjes, përfshirë kurorat, urat dhe vinerët. Ajo u pyet se sa duhet të gërryhet dhëmbi dhe pse sasia e strukturës së hequr mund të ndryshojë nga një stomatolog te tjetri, edhe kur bëhet fjalë për të njëjtin lloj kurore.

Specialistja e cilësoi këtë çështje si veçanërisht të rëndësishme për të. Sipas saj, pacientët e njohin si profesioniste që synon të heqë sa më pak nga dhëmbi, ndërsa gjatë specializimit është edukuar që gërryerja të mbahet në minimum dhe të kryhet vetëm kur nevojitet.

Ruajtja e dhëmbit dhe qëndrueshmëria e punimit

Halili tha se te pacientët me strukturë të shëndoshë dentare, mjeku duhet të jetë i kujdesshëm dhe të ruajë sa më shumë indin natyral. Ajo nënvizoi se kjo qasje kërkon njohuri të avancuara për teknikat e ngjitjes, në mënyrë që punimet protetike të jenë të qëndrueshme edhe kur është hequr më pak material nga dhëmbi.

Sipas saj, specialistët e protetikës kanë rol të rëndësishëm në ruajtjen e strukturës dentare gjatë trajtimeve. Përzgjedhja e mënyrës së trajtimit dhe kujdesi me të cilin kryhet gërryerja ndikojnë në ruajtjen e dhëmbit natyral.

Halili vuri në dukje gjithashtu se pacientët, ndonjëherë për shkak të mungesës së informacionit, kërkojnë vetë ura dentare edhe kur dhëmbët janë ende të pranishëm dhe problemi mund të trajtohet në një mënyrë tjetër. Diskutimi përfshiu rëndësinë e vlerësimit profesional përpara vendosjes së punimeve protetike.