Kuvendi diskuton për seancën e radhës dhe emërimet në BQK e RTK

Kryesia e Kuvendit mblidhet sot në orën 11:00 me gjashtë pika në rend dite. Në fokus janë caktimi i rendit të seancës së ardhshme dhe përzgjedhja e anëtarëve për bordet e BQK-së e RTK-së.

Kryesia e Kuvendit të Kosovës pritet të mblidhet sot në orën 11:00, me gjashtë pika të parapara për shqyrtim. Mes tyre janë përgatitjet për seancën e ardhshme plenare dhe propozimet për përzgjedhjen e anëtarëve të bordeve të BQK-së dhe RTK-së.

Në fillim të mbledhjes, Kryesia do të shqyrtojë miratimin e procesverbalit nga takimi i mëparshëm. Më pas, anëtarët pritet të diskutojnë propozimin e rendit të ditës për seancën e ardhshme plenare.

Rendi i propozuar për seancën përfshin miratimin e procesverbaleve të seancave të mëparshme, deklarimet jashtë rendit të ditës dhe pyetjet parlamentare. Në të është përfshirë edhe përzgjedhja e dy anëtarëve joekzekutivë të Bordit të Bankës Qendrore të Republikës së Kosovës.

Një tjetër pikë lidhet me formimin e një komisioni ad hoc, i cili do të përzgjedhë kandidatët për katër vende në Bordin e Radiotelevizionit të Kosovës: dy anëtarë nga komuniteti shqiptar, një nga komuniteti serb dhe një nga komunitetet joshumicë.

Në rend dite është përfshirë gjithashtu propozimi i Grupit Parlamentar të Listës Serbe për emërimin e deputetëve në komisionet parlamentare. Këto pika do të shqyrtohen nga Kryesia në kuadër të përgatitjeve për punimet e ardhshme të Kuvendit.