Mbështetje financiare për renovimin e banesave në Mitrovicën e Veriut dhe Zveçan

275 mijë euro janë ndarë për renovimin e shtëpive dhe njësive të banimit në Mitrovicën e Veriut dhe Zveçan. Vendimi vjen pas kërkesave të banorëve dhe verifikimeve të kryera në terren.

Qeveria e Kosovës ka ndarë 275 mijë euro për renovimin e shtëpive dhe njësive të banimit të pjesëtarëve të komuniteteve joshumicë në Mitrovicën e Veriut dhe Zveçan. Vendimi synon të përmirësojë kushtet e banimit për qytetarët në këto dy komuna.

Kryeministri Albin Kurti tha se Qeveria është e përkushtuar për barazi ndërmjet të gjitha komuniteteve dhe për përmirësimin e kushteve të jetesës së qytetarëve.

Ministri i Administrimit të Pushtetit Lokal, Elbert Krasniqi, bëri të ditur se ministria kishte marrë kërkesa nga pjesëtarë të komuniteteve joshumicë për ndihmë financiare, me qëllim të renovimit të shtëpive dhe njësive të banimit.

Pas kërkesave, sipas Krasniqit, janë kryer verifikime në terren. Ato kanë evidentuar se në disa shtëpi dhe njësi banimi nevojiten ndërhyrje për t’i përmirësuar kushtet e jetesës.

Ministri tha se banorët përballen me kushte të papërshtatshme dhe kanë nevojë për mbështetje financiare për renovime, në mënyrë që të sigurohen kushte të përshtatshme dhe të qëndrueshme banimi.

Mjetet e ndara do të përdoren për renovimin e banesave në Mitrovicën e Veriut dhe Zveçan, në kuadër të mbështetjes së komuniteteve joshumicë në këto komuna.