Mbeturina në disa pjesë të kryeqytetit, kompania “Pastrimi” tregon çfarë po bën

Mbeturinat e grumbulluara në disa pjesë të Prishtinës kanë nxitur shqetësime dhe kërkesa për pastrim të rregullt. “Pastrimi” thotë se po punon me kapacitetet maksimale, ndërsa deponia në Mirash mbyllet në mesnatë.

Mbeturinat e grumbulluara në hapësira publike kanë shqetësuar banorët e Prishtinës, të cilët kanë kërkuar pastrim të rregullt. Kompania Rajonale e Mbeturinave “Pastrimi” thotë se po punon me kapacitetet maksimale që ka në dispozicion për të mbledhur mbeturina në sa më shumë lagje të kryeqytetit.

Gjatë ditës, qytetarët kanë raportuar për mbeturina në pjesë të ndryshme të Prishtinës. Përveç kërkesave për pastrim, janë ngritur shqetësime edhe për mungesën e kontejnerëve, informatave për linjat e autobusëve në stacione dhe mirëmbajtjen e rrugëve.

Deponia në Mirash mbyllet në mesnatë

Në një reagim, “Pastrimi” ka thënë se po përpiqet ta kryejë shërbimin brenda kapaciteteve të veta, duke marrë parasysh edhe orarin e deponisë në Mirash, ku zbrazën kamionët e mbeturinave.

“Deponia në Mirash ku bëjmë zbrazjen e kamionëve mbyllet në orën 00:00, andaj po mundohemi me shpejtësi që të grumbullojmë mbeturina në sa më shumë lagje të jetë e mundur”, thuhet në njoftimin e kompanisë.

Kompania ka përsëritur se po punon me kapacitetet maksimale për të ofruar shërbimin. Raportimet e qytetarëve dhe mediave gjatë ditës kanë nxjerrë në pah shqetësimet për gjendjen e hapësirave publike dhe shërbimet komunale në kryeqytet.