Memorandumi i ri synon publikim më të rregullt të dokumenteve në Lipjan

Lipjani është zgjedhur mes tri komunave për zbatimin e një memorandumi me Agjencinë për Informim dhe Privatësi. Marrëveshja synon publikim më të standardizuar të dokumenteve dhe monitorim të detyrimeve ligjore për transparencë.

Komuna e Lipjanit dhe Agjencia për Informim dhe Privatësi kanë nënshkruar memorandum bashkëpunimi, që synon avancimin e transparencës institucionale dhe forcimin e llogaridhënies. Marrëveshja u nënshkrua nga kryetari i Lipjanit, Imri Ahmeti, dhe komisionerja e Agjencisë, Krenare Sogojeva Dermaku.

Sipas njoftimit të Komunës, Lipjani është përzgjedhur në mesin e tri komunave në nivel vendi për zbatimin e kësaj marrëveshjeje.

Memorandumi parasheh standardizimin e publikimit proaktiv të dokumenteve dhe informacioneve publike, si dhe përditësimin e rregullt të të dhënave. Parashikohet gjithashtu monitorimi i zbatimit të obligimeve ligjore për transparencë.

Bashkëpunimi do të zhvillohet në kuadër të Planit të Veprimit të Partneritetit për Qeverisje të Hapur 2026–2028. Zbatimi i marrëveshjes lidhet me Ligjin për Qasje në Dokumente Publike.

Komuna e Lipjanit ka bërë të ditur se mbetet e përkushtuar në forcimin e transparencës dhe llogaridhënies institucionale.