Mjekët i kanë kërkuar Billy Joelit të mos kthehet ende në skenë

Billy Joel po përballet me kufizime shëndetësore që e pengojnë të ngasë makinën dhe të performojë. Këngëtari shpreson të rikthehet në skenë nëse testet dhe mjekët e vlerësojnë këtë të sigurt. Ndërkohë, mbi 70 motoçikleta nga koleksioni i tij do të dalin në ankand.

Billy Joel ka treguar se gjendja shëndetësore po e pengon për momentin të drejtojë makinën dhe të performojë. Muzikanti 77-vjeçar tha se kufizimet lidhen me hidrocefalusin normotensiv, për të cilin kishte folur edhe vitin e kaluar.

Në një intervistë për The Hollywood Reporter, Joel tha se aktualisht nuk i lejohet të ulet pas timonit. Ai la të hapur mundësinë e rikthimit në skenë, por theksoi se më parë do t’i nënshtrohet testeve të tjera për të parë nëse performanca është e sigurt për të.

Mjekët kërkojnë kujdes

Këngëtari tregoi se neurologu i tij e ka paralajmëruar për ndikimin që mund të ketë një koncert në shëndetin e tij, duke e krahasuar atë me efektet e një tronditjeje. Sipas Joelit, zhurma e lartë, ndriçimi, stresi i performancës dhe energjia e publikut janë ndër faktorët që duhet të merren parasysh.

Ai tha se dëgjimi i është vështirësuar dhe se problemi më i madh për të ka qenë ekuilibri. Megjithatë, dëshira për t’u rikthyer në skenë mbetet, nëse ekipi mjekësor e vlerëson të sigurt.

Koncertet e planifikuara të Joelit u anuluan në maj të vitit 2025. Në atë kohë, ekipi i tij bëri të ditur se shfaqjet kishin përkeqësuar gjendjen dhe kishin ndikuar në dëgjimin, shikimin dhe ekuilibrin e tij. Joel u kërkoi falje fansave dhe i falënderoi për mirëkuptimin.

Koleksioni i motoçikletave në ankand

Ndryshimet për shkak të gjendjes shëndetësore prekin edhe koleksionin e tij privat. Më shumë se 70 motoçikleta të këngëtarit do të dalin në ankand më 20 dhe 21 nëntor, në Qendrën Javits të Nju Jorkut, në një aktivitet të organizuar nga Gooding & Christie's.

Sipas shtëpisë së ankandeve, Joel synon që të ardhurat t’i drejtojë për Fondacionin Joel, të cilin e drejton së bashku me gruan e tij, Alexis. Në mesin e motoçikletave është edhe një Triumph T140 Bonneville e vitit 1978, e dhuruar për nder të koncertit të tij të 150-të me bileta të shitura në Madison Square Garden. Joel tha se ka qenë kënaqësi ta krijonte koleksionin dhe se tani dëshiron që motoçikletat t’i marrë dikush tjetër në rrugë.