Pakoja e dyshimtë në burgun e Dubravës: njoftohet Policia e Kosovës

Një pako e dyshimtë u gjet gjatë kontrolleve të sigurisë në Qendrën Korrektuese të Dubravës. ShKK njofton se lënda e dyshuar narkotike, bashkë me mbështjellësin, peshonte 87 gramë dhe se për rastin është njoftuar Policia e Kosovës.

Zyrtarët korrektues kanë zbuluar një pako të dyshimtë brenda perimetrit të Qendrës Korrektuese në Dubravë, gjatë kontrolleve të rregullta të sigurisë. Shërbimi Korrektues i Kosovës (ShKK) njoftoi se ndërhyrja parandaloi futjen e kontrabandës në institucion.

Sipas njoftimit të ShKK-së, pakoja dyshohet se ishte hedhur nga jashtë. Ajo u gjet gjatë kontrolleve të zhvilluara në objektin korrektues.

Pas kontrollit dhe matjes, pesha e lëndës së dyshuar narkotike, bashkë me mbështjellësin, rezultoi 87 gramë, bëri të ditur ShKK-ja.

Për rastin është njoftuar Policia e Kosovës, e cila do të merret me trajtimin e mëtejmë të çështjes. Njoftimi për zbulimin u publikua nga Shërbimi Korrektues përmes një postimi në Facebook.