Panama goditet nga tërmeti i fuqishëm, raportohen të lënduar dhe dëme

Një tërmet i fuqishëm me magnitudë 7.7 goditi Panamanë, duke dëmtuar ndërtesa dhe nxitur evakuime. Raportohen të paktën dy të lënduar, ndërsa paralajmërimi për cunami u hoq më vonë.

Një tërmet me magnitudë 7.7 goditi të premten Panamanë, duke shkaktuar dëme në ndërtesa dhe evakuime të banorëve. Sipas raportimeve, të paktën dy persona u lënduan, ndërsa deri në kohën e raportimit nuk ishte konfirmuar asnjë viktimë.

Pamjet e publikuara nga mediat lokale treguan shembjen e një katedraleje dhe rënien e një pjese të fasadës së një hoteli mbi një veturë në Penonomé, në pjesën qendrore të vendit. Dëmet më të mëdha u raportuan në provincat Veraguas, Herrera dhe Los Santos.

Sipas Shërbimit Gjeologjik të Shteteve të Bashkuara (USGS), epiqendra ishte pranë skajit jugor të Panamasë, rreth 12 kilometra në perëndim-jugperëndim të komunitetit Pitaloza Arriba. Pas tërmetit kryesor u regjistruan edhe disa lëkundje pasuese.

Lëkundjet u ndien edhe në kryeqytetin Panama City, ku ndërtesat u tundën dhe banorët dolën në rrugë. Omar Smith, nga Shërbimi Kombëtar i Mbrojtjes Civile, tha për transmetuesin Telemetro Reporta se deri atëherë nuk kishte raportime për dëme në kryeqytet. Tërmeti u ndie gjithashtu në disa zona të Kolumbisë fqinje.

Pas lëkundjeve u lëshua paralajmërim për cunami në pjesën lindore të Oqeanit Paqësor, por ai u hoq më vonë. Rene Garcia, drejtues i operacioneve emergjente në Sistemin Kombëtar të Mbrojtjes Civile të Panamasë, i tha AFP-së se nuk ishte konfirmuar asnjë viktimë.

Presidenti i Panamasë, José Raúl Mulino, u bëri thirrje qytetarëve të ruanin qetësinë. “Ajo që ndodhi nuk duhet të përdoret për të shkaktuar alarm apo çrregullim”, shkroi ai në rrjetin X.

Panamaja ndodhet në Unazën e Zjarrit të Paqësorit, zonë rreth 40 mijë kilometra e gjatë me vullkane dhe thyerje tektonike, ku ndodhin shumica e tërmeteve në botë.