Pas vrasjes në Gjilan, Rrjeti i Grave kërkon masa ligjore kundër femicidit

Rrjeti i Grave të Kosovës fton qytetarët, organizatat dhe institucionet në protestën e 25 nëntorit kundër vrasjes së grave dhe dhunës me bazë gjinore. Pas vrasjes në Gjilan, RrGK kërkon përkufizim ligjor të femicidit dhe hetim që merr parasysh edhe historikun e dhunës.

Rrjeti i Grave të Kosovës (RrGK) u ka bërë thirrje qytetarëve, organizatave dhe institucioneve që t’i bashkohen protestës kundër vrasjes së grave dhe dhunës me bazë gjinore, e cila do të mbahet më 25 nëntor.

Në një opinion, Adelina Berisha, drejtoreshë e Programit për Adresimin e Dhunës me Bazë Gjinore në RrGK, tha se vrasja e fundit në Gjilan e rikthen vëmendjen te nevoja për ta trajtuar femicidin si fenomen të lidhur me pabarazinë gjinore dhe marrëdhëniet e pushtetit.

Berisha theksoi se njohja e gjinisë si rrethanë rënduese në legjislacion nuk mjafton, nëse rastet nuk hetohen duke marrë parasysh kontekstin e dhunës dhe rrethanat që i kanë paraprirë. Ajo kërkoi një përkufizim ligjor të femicidit dhe krijimin e mekanizmit “Femicide Watch”, për monitorimin e rasteve dhe identifikimin e dështimeve institucionale.

Sipas saj, këto masa do të ndihmonin në analizimin e rasteve dhe në parandalimin e vrasjeve të ardhshme. Berisha tha se ato janë në përputhje me qëllimet e Konventës së Stambollit për parandalimin e dhunës ndaj grave, mbrojtjen e viktimave dhe ndjekjen penale të kryerësve.

Hetimi të shqyrtojë edhe historikun e dhunës

Berisha nënvizoi se mungesa e një raportimi paraprak nga viktima nuk duhet të interpretohet si dëshmi se dhuna nuk ka ndodhur. Ajo kërkoi që institucionet të hetojnë historikun e marrëdhënies, kërcënimet, kontrollin dhe format e tjera të mundshme të dhunës.

Sipas saj, drejtësia duhet të shqyrtojë jo vetëm momentin e vrasjes, por edhe rrethanat e mëparshme dhe çdo dështim institucional që mund të ketë ndikuar në humbjen e jetës. Këto elemente, tha ajo, duhet të merren parasysh gjatë hetimit dhe përcaktimit të përgjegjësisë penale.

RrGK u ka bërë thirrje të gjitha palëve që t’i bashkohen protestës më 25 nëntor. Berisha ftoi që solidariteti të kthehet në veprim dhe që të kërkohen drejtësi, llogaridhënie dhe masa konkrete për parandalimin e femicideve.