Peleshi dënon hyrjen me forcë në Kuvend: Dhuna dëmton interesin publik

Niko Peleshi dënoi hyrjen e protestuesve në Kuvend dhe zjarrvënien në godinë. Ai tha se dhuna nuk përfaqëson protestën demokratike dhe u bëri thirrje subjekteve politike të distancohen nga nxitjet për dhunë.

Kryetari i Kuvendit të Shqipërisë, Niko Peleshi, ka dënuar hyrjen e protestuesve në godinën e parlamentit dhe zjarrvënien në objekt. Në një reagim në Facebook, ai tha se sulmi ndaj institucioneve publike nuk mund të konsiderohet pjesë e një proteste demokratike.

Peleshi theksoi se vandalizmi nuk ka lidhje me studentët dhe se dhuna e shkatërrimi nuk i shërbejnë asnjë kauze. Sipas tij, këto veprime dëmtojnë interesin publik dhe shoqërinë.

“Shënjestrimi i godinës së Kuvendit dhe i institucioneve publike, si dhe kthimi i tyre në caqe të zemërimit të verbër, janë të papranueshme”, shkroi ai në postimin e tij.

Kreu i Kuvendit u bëri thirrje subjekteve politike të distancohen nga nxitjet dhe thirrjet për dhunë. Ai shtoi se agjendat politike nuk duhet të vendosen mbi interesin e vendit.