Politologu Mujanoviq: Operativë serbë dhe rusë janë aktivë në Ballkanin Perëndimor

Jasmin Mujanoviq thotë se Serbia dhe Rusia bashkëpunojnë ngushtë në çështjet që lidhen me Kosovën dhe Bosnjë-Hercegovinën. Politologu pretendon se operativë të të dyja vendeve janë aktivë në disa shtete të Ballkanit Perëndimor.

Politologu boshnjako-amerikan Jasmin Mujanoviq thotë se Serbia vijon të ndjekë politikë armiqësore ndaj Kosovës dhe disa shteteve të tjera të ish-Jugosllavisë, ndërsa bashkëpunon ngushtë me Rusinë në çështje që lidhen me Kosovën dhe Bosnjë-Hercegovinën.

Në një intervistë për Telegrafin, Mujanoviq e vendosi qasjen e Beogradit në kontekstin e ndikimit rus në Ballkanin Perëndimor dhe të bashkëpunimit mes strukturave serbe dhe ruse të inteligjencës. Ai përmendi Kosovën, Bosnjë-Hercegovinën dhe Malin e Zi si shtetet ndaj të cilave, sipas tij, Serbia mban qëndrim veçanërisht armiqësor.

“Duhet të jemi të qartë se Serbia ende ndjek një politikë thellësisht armiqësore dhe të dëmshme ndaj pothuajse të gjitha shteteve fqinje, veçanërisht ndaj shteteve që ishin pjesë e ish-Jugosllavisë”, deklaroi Mujanoviq.

Ai tha se presidenti serb Aleksandar Vuçiq e ndryshon qasjen dhe intensitetin e presionit ndaj këtyre vendeve, në varësi të nevojave politike të momentit. Mujanoviq vlerësoi se bashkëpunimi mes Serbisë dhe Rusisë shtrihet edhe në fushën e inteligjencës dhe sigurisë.

Bashkëpunimi i inteligjencës

Sipas politologut, bashkëpunimi mes shërbimeve serbe dhe ruse është i njohur prej vitesh. Ai iu referua publikimit të dokumenteve qeveritare pas largimit të ish-kryeministrit maqedonas Nikola Gruevski, kur vendi njihej si Republika e Maqedonisë dhe sot quhet Maqedonia e Veriut.

Mujanoviq pretendoi se operativë serbë dhe rusë janë aktivë në Kosovë, Mal të Zi dhe Bosnjë-Hercegovinë. Ai tha se, sipas vlerësimit të tij, për këtë bashkëpunim ka dëshmi bindëse.