Presidentja diskuton me strehimoret sfidat dhe mbështetjen për gratë

Mbrojtja e grave nga dhuna dhe mbështetja për riintegrimin e tyre ishin në fokus të takimit të presidentes Justina Shiroka-Pula me përfaqësueset e strehimoreve. Ato diskutuan për nevojat e strehimoreve dhe mundësitë për bashkëpunim më të fuqishëm me institucionet.

Presidentja e Kosovës, Justina Shiroka-Pula, priti në takim një delegacion të përfaqësueseve të strehimoreve të vendit, me të cilat diskutoi për mbrojtjen dhe mbështetjen e grave që përballen me dhunë.

Gjatë takimit, ajo vlerësoi punën dhe përkushtimin e strehimoreve, duke theksuar rolin e tyre në garantimin e sigurisë së grave dhe në mbështetjen e riintegrimit të tyre në shoqëri.

Shiroka-Pula nënvizoi se mbrojtja nga dhuna dhe garantimi i dinjitetit të grave janë përgjegjësi e përbashkët e institucioneve dhe shoqërisë. Ajo theksoi se asnjë grua nuk duhet të përballet e vetme me dhunën apo vështirësitë.

Në bisedë u trajtuan sfidat dhe nevojat konkrete të strehimoreve, si dhe mundësitë për ta forcuar bashkëpunimin e tyre me institucionet. Synimi, sipas presidentes, është që shërbimet për gratë që përjetojnë dhunë të jenë të qëndrueshme, të qasshme dhe efektive.

Shiroka-Pula shprehu gatishmërinë për bashkëpunim të vazhdueshëm me përfaqësueset e strehimoreve dhe për shqyrtimin e mundësive për mbështetjen e punës së tyre. Ajo theksoi gjithashtu rëndësinë e trajtimit të çështjeve që kërkojnë vëmendje institucionale.