Prodhimi në disa hidrocentrale të Zvicrës bie ndjeshëm, energjia në treg shtrenjtohet

Thatësira po ul prodhimin e dhjetëra hidrocentraleve në Zvicër, ndërsa disa centrale janë ndalur ose punojnë me kapacitet të reduktuar. Çmimi spot i energjisë është rritur me 9 për qind brenda një jave, ndërsa kontratat për furnizimin në vitin 2027 kushtojnë mbi 60 për qind më shumë se gjatë verës.

Thatësira e zgjatur në Zvicër ka ulur ndjeshëm nivelet e lumenjve dhe liqeneve, duke reduktuar prodhimin e energjisë elektrike dhe detyruar dhjetëra hidrocentrale të ndalin ose kufizojnë punën. Rënia e prodhimit vendas po ndikon edhe në çmimet e energjisë në tregun zviceran.

Sipas mediumit zviceran Blick, në vend funksionojnë rreth 1.400 hidrocentrale të vogla, shumica të vendosura përgjatë lumenjve dhe përrenjve. Në këtë periudhë të vitit, centralet lumore zakonisht kontribuojnë me rreth 10 deri në 15 për qind të energjisë elektrike të prodhuar në Zvicër, por tani prodhimi i tyre ka rënë në një pjesë të vogël të nivelit të zakonshëm.

Prodhimi bie në disa rajone

Hidrocentrali i Höngg-ut, në lumin Limmat, është ndalur, ndërsa tri centralet lumore të ndërmarrjes elektrike të Cyrihut po prodhojnë vetëm gjysmën e sasisë së mëparshme. Rënie është shënuar edhe në centralet përgjatë lumenjve Rajn dhe Aare.

Kompania energjetike Alpiq ka bërë të ditur se prodhimi në centralet e saj përgjatë Aare-s është rreth 70 për qind nën nivelin e zakonshëm. Në shtator, centrali i Rheinau-s prodhoi vetëm 43 për qind të mesatares së dhjetë viteve të fundit.

Reshjet e fundit nuk kanë sjellë përmirësim të qëndrueshëm. Kaspar Böhi, përgjegjës i kompanisë Thurkraftwerk AG, paralajmëroi se centralet përgjatë lumit Thur mund të ndalen sërish nëse nuk ka reshje të reja.

Tregu reagon ndaj mungesës së ujit

Ulja e prodhimit vendas po i shtyn disa furnizues, veçanërisht kompanitë më të vogla që varen nga hidrocentralet lokale, të blejnë më shumë energji në tregjet e jashtme. Eksperti i energjisë René Baggenstos, nga Enerprice AG, tha se nivelet e ulëta të ujit po ndikojnë në çmimet afatshkurtra. Sipas tij, çmimi spot në Zvicër është rritur me 9 për qind krahasuar me javën paraprake.

Baggenstos vlerësoi se një faktor kryesor i rritjes së çmimeve gjatë muajve të fundit është edhe lufta në Iran dhe ndikimi i saj në çmimet e gazit. Familjet zvicerane janë të mbrojtura nga ndikimi i menjëhershëm, pasi tarifat për vitin e ardhshëm janë përcaktuar tashmë.

Megjithatë, energjia elektrike për furnizim në vitin 2027 kushton aktualisht në tregun e kontratave afatgjata mbi 60 për qind më shumë se gjatë verës. Nëse çmimet e larta vazhdojnë, ato mund të reflektohen në faturat e konsumatorëve në vitet e ardhshme.