Punimet në nënkalimin e lagjes “Dardania” zvarriten, banorët kërkojnë ndërhyrje

Njëri nga nënkalimet në lagjen “Dardania” të Tetovës vazhdon të jetë i bllokuar, duke i detyruar banorët të bëjnë rrugë shtesë ose të kalojnë në mënyrë të rrezikshme mbi autostradë. Komuna thotë se punimet po ecin sipas planit, por ende nuk ka dhënë datë për përfundimin e projektit.

Banorët dhe bujqit e lagjes “Dardania” në Tetovë po përballen me vështirësi për të arritur te tokat e tyre, pasi njëri nga dy nënkalimet nën autostradën Shkup–Gostivar mbetet i bllokuar. Punimet për rregullimin e tyre nisën në pranverë, por ende nuk kanë përfunduar.

Për të vazhduar rrugën, disa banorë kalojnë mbi autostradë, ndonëse kjo është e ndaluar dhe e rrezikshme. Të tjerët detyrohen të bëjnë rreth 1.5 kilometra rrugë shtesë. Sipas banorëve, mbyllja po ua vështirëson edhe punimin e tokave bujqësore.

“Është shumë rrezik për të kaluar. Duhet ta bëjnë sa më shpejt rrugën që të kalojmë për në fusha”, tha një banor, duke u ankuar se nënkalimi ka disa muaj që është mbyllur. Një tjetër tha se duhet të bëjë një rrugë të gjatë për shkak të bllokimit.

Komuna: Punimet po ecin sipas planit

Nga Komuna e Tetovës kanë deklaruar se punimet për rregullimin e kanalizimit atmosferik po zhvillohen sipas dinamikës së paraparë nga realizuesi. Sipas përfaqësueses së komunës, Besarta Ramadani, ditë më parë u bë lidhja me gypin qendror në rrugën për në Zhelinë dhe u realizua depërtimi në autostradën Shkup–Gostivar.

Në këtë pjesë, përveç kanalizimit atmosferik, është rregulluar edhe tubacioni i rrjetit të ujësjellësit. Komuna nuk dha një datë të saktë për përfundimin e plotë të projektit.

Nënkalimet kanë qenë prej vitesh problem për kalimtarët. Gjatë ditëve me shi, uji i grumbulluar ka shkaktuar dëme në deri në tre automjete në ditë, sipas raportimit.

Gjatë xhirimeve në terren, nuk u panë ekskavatorë apo punëtorë duke punuar. Me afrimin e motit të lig, punimet mund të vështirësohen, pasi gërmimet duhet të arrijnë në më shumë se pesë metra thellësi.