Reagimi i Rio Ferdinandit ndaj artikullit kritik për Cristiano Ronaldon

Rio Ferdinand reagoi pasi Cristiano Ronaldo u cilësua “narcisist” në një artikull kritik. Ish-mbrojtësi i Manchester Unitedit e quajti këtë përshkrim “terminologji të çmendur” dhe vuri në pah kontributin e portugezit për futbollin dhe vendin e tij.

Rio Ferdinand ka dalë në mbrojtje të Cristiano Ronaldos, pasi një artikull kritik e cilësoi sulmuesin portugez si “narcisist” dhe kërkoi që ai të mos ftohej më në Kombëtaren e Portugalisë.

Debati vjen pas largimit të parakohshëm të Ronaldos nga grumbullimi i përfaqësueses. Sulmuesi 41-vjeçar ishte larguar pasi trajneri Jorge Jesus vendosi të mos e aktivizonte në ndeshjen ndaj Norvegjisë, të zhvilluar më 27 shtator.

Të mërkurën, Ronaldo publikoi një deklaratë ku akuzoi Jesusin se nuk i kishte përmbushur premtimet që i kishte bërë. Pas publikimit të saj, ish-bashkëlojtari i tij te Manchester Unitedi reagoi ndaj një shkrimi të gazetës “The Mirror”, të autorit Harry Brent.

Artikulli i Brentit e përshkruante Ronaldon si “narcisist” dhe sugjeronte se ai duhej lënë jashtë Kombëtares portugeze pas deklaratës së tij.

Ferdinand e kundërshtoi ashpër këtë përshkrim në një postim në rrjetin social X. “Narcisist? Terminologji e çmendur për t’u përdorur për dikë që i ka dhënë kaq shumë futbollit dhe vendit të tij”, shkroi ai, duke iu drejtuar më pas autorit të artikullit me fjalët: “Harry Brent, mblidhe pak mendjen!”

Mbetet të shihet nëse Federata Portugeze do të marrë ndonjë masë ndaj Ronaldos dhe nëse ai do të jetë i disponueshëm për t’u ftuar në ndeshjet e nëntorit.