Reperi Capital T kërkon përgjegjësi për dhunën gjatë protestave në kryeqytetin shqiptar

Capital T reagoi pas përplasjeve në protestat e Tiranës, duke dënuar dhunën ndaj qytetarëve. Reperi kërkoi që policia të garantojë sigurinë dhe dinjitetin e protestuesve.

Reperi Capital T ka reaguar pas përplasjeve mes protestuesve dhe policisë në Tiranë, duke dënuar dhunën ndaj qytetarëve dhe duke kërkuar respektimin e të drejtës për protestë e shprehje të lirë.

Protestat, të njohura edhe si “Revolucioni i Flamingos”, u përshkallëzuan të martën. Disa të rinj mbetën të lënduar gjatë përplasjeve me forcat e policisë.

Në një postim, reperi tha se dhuna nuk mund të jetë përgjigje ndaj protestës dhe shprehjes së lirë. Ai dënoi atë që e cilësoi si brutalitet policor ndaj qytetarëve.

Capital T theksoi se policia duhet të garantojë sigurinë dhe dinjitetin e çdo qytetari, në vend që të shkaktojë frikë. Ai kërkoi respektim të të drejtave të njeriut, drejtësi dhe përgjegjësi për çdo akt dhune.

Ngjarjet kanë nxitur reagime edhe nga figura të tjera publike, të cilat kanë shprehur shqetësim për dhunën dhe lëndimin e protestuesve. Tensionet në kryeqytetin shqiptar kanë vazhduar edhe sot, me përplasje pranë Kryeministrisë mes protestuesve dhe policisë.