Reshjet e rrëmbyeshme ndalin duelin mes Ümraniyesporit dhe Bolusporit

Reshjet e dendura përmbytën fushën dhe detyruan gjyqtarin të ndalte duelin mes Ümraniyesporit dhe Bolusporit. Loja u ndërpre në minutën e 58-të, kur Boluspori po fitonte 1:0.

Ndeshja mes Ümraniyesporit dhe Bolusporit është ndërprerë në pjesën e dytë, pasi reshjet e dendura të shiut e bënë fushën të papërshtatshme për lojë.

Lojtarët u përballën me një fushë të mbuluar nga uji. Pas vlerësimit të gjendjes së saj, gjyqtari vendosi ta ndalë përkohësisht takimin.

Sipas pamjeve të publikuara nga ndeshja, kapiteni i Ümraniyesporit, Glumac, ia tregoi gjyqtarit Berkay Erdemir gjendjen e terrenit. Arbitri e ndërpreu lojën në minutën e 58-të, pas konsultimeve me kapitenët e skuadrave.

Në momentin e ndërprerjes, Boluspori ishte në epërsi minimale, 1:0. Në këtë skuadër luan edhe portieri shqiptar Tafas.

Ndeshja mund të vazhdojë më vonë gjatë mbrëmjes ose të zhvillohet në një ditë tjetër. Deri atëherë, takimi mbetet i pezulluar për shkak të kushteve të krijuara nga shiu.