Rritjet mbi 3% të sigurimit shëndetësor mund të kalojnë në votim popullor

Një nismë në Parlamentin zviceran synon t’u japë qytetarëve mundësinë të votojnë kundër rritjeve të primeve të sigurimit shëndetësor mbi 3%. Për vitin 2027, rritja mesatare parashikohet në 5%, ndërsa propozimi ende duhet të miratohet nga Parlamenti.

Një propozim në Parlamentin zviceran mund t’u japë qytetarëve mundësinë të kundërshtojnë përmes votës rritjen vjetore të primeve të sigurimit shëndetësor mbi 3%. Nismën e ka paraqitur Pierre-Yves Maillard, përfaqësues i Partisë Socialiste në Këshillin e Shteteve.

Sipas propozimit, rritjet që kalojnë këtë prag do t’i nënshtroheshin referendumit opsional. Kjo do të thotë se, nëse mblidhen 50 mijë nënshkrime, çështja do të kalonte në votim popullor.

Maillard argumenton se sigurimi shëndetësor është i detyrueshëm dhe se kostot e tij rëndojnë gjithnjë e më shumë buxhetet familjare. Sipas tij, qytetarët kanë pak ndikim në vendimet për rritjen e primeve, ndaj duhet të kenë mundësi të shprehen përmes votës, si në disa vendime për rritjen e taksave ose të TVSH-së.

Rritja mesatare e primeve për vitin 2027 parashikohet të jetë 5%. Nëse propozimi do të miratohej, kjo mund të hapte rrugën për një votim që këtë vjeshtë.

Pikëpamje të kundërta për pasojat

Maillard beson se mundësia e referendumit do të ushtronte presion mbi palët që përcaktojnë tarifat e shërbimeve shëndetësore. Ai thotë se kundërshtimi i qytetarëve ndaj rritjeve mund t’i shtyjë këto palë të shmangin tarifa të tepërta dhe të kontribuojë në frenimin e kostove të kujdesit shëndetësor.

Përfaqësues nga qendra e djathtë kanë shprehur skepticizëm për mënyrën se si do të funksiononte nisma. Këshilltari Kombëtar Benjamin Roduit thotë se refuzimi i rritjes së primeve duhet të shoqërohet edhe me refuzimin e rritjes së kostove të kujdesit shëndetësor, gjë që mund të nënkuptojë uljen e përfitimeve të mbuluara nga sigurimi.

Roduit ka ngritur gjithashtu çështjen se si do të vendosnin votuesit se cilat shërbime shëndetësore duhen reduktuar, anuluar apo përmirësuar. Sipas tij, pikëpamjet e ndryshme mund të krijojnë bllokim në vendimmarrje.

Propozimi duhet fillimisht të marrë mbështetjen e shumicës së Parlamentit zviceran. Debati në Këshillin e Shteteve mund të zhvillohet në dhjetor.