The Mall shndërrohet në fushë kriketi për aktivitetin e Princit William

The Mall në Londër u kthye përkohësisht në fushë kriketi, ku Princi William luajti përkrah yjeve të këtij sporti. Aktiviteti promovoi çmimin mjedisor Earthshot, ndërsa India do të presë samitin dhe ceremoninë e ardhshme të ndarjes së çmimeve.

Princi William u përfshi në një ndeshje joformale kriketi në The Mall, rrugën qendrore të Londrës që të çon drejt Pallatit Buckingham. Përkohësisht, shëtitorja e njohur për procesionet mbretërore dhe festimet publike u kthye në një fushë loje.

Aktiviteti u organizua për të promovuar çmimin mjedisor Earthshot, të themeluar nga William në vitin 2020. Në ndeshje morën pjesë edhe emra të njohur të kriketit, mes tyre ish-kapiteni i Indisë Sourav Ganguly, legjenda e Indive Perëndimore Brian Lara dhe kapiteni i Anglisë Joe Root.

William, i veshur me këmishë dhe pulovër, goditi disa topa të dërguar lehtë me shkopin e kriketit. Mes lojërave, ai bisedoi me spektatorët dhe pozoi për fotografi.

Ngjarja kishte për qëllim të shënonte lidhjet mes Mbretërisë së Bashkuar dhe Indisë, dy vende ku kriketi është veçanërisht i popullarizuar. India pritet të presë muajin e ardhshëm samitin vjetor të Earthshot dhe ceremoninë e ndarjes së çmimeve.

Çmimi Earthshot u jepet çdo vit pesë fituesve. Secili merr nga një milion paund për të zhvilluar zgjidhje që synojnë mbrojtjen e planetit.