Tre pushkë gjuetie u sekuestruan pas vrasjes në Pogragjë

Një 29-vjeçar u vra në Pogragjë të Gjilanit, ndërsa babai i tij, 53 vjeç, dyshohet për ngjarjen dhe ndodhet në arrati. Prokuroria njoftoi se janë sekuestruar tri pushkë gjuetie me leje të skaduara dhe se është urdhëruar autopsia.

Një 29-vjeçar është vrarë në fshatin Pogragjë të Gjilanit, ndërsa i dyshuari për ngjarjen, babai i tij 53-vjeçar, është larguar dhe ndodhet në arrati. Prokuroria Themelore në Gjilan ka bërë të ditur se rasti po hetohet nga Departamenti për Krime të Rënda.

Sipas njoftimit, Policia e Kosovës e informoi Prokurorin e Shtetit për rastin më 11 tetor 2026, rreth orës 19:20. I dyshuari, me inicialet R.A., dyshohet se për motive që ende nuk janë bërë të ditura, përdori armë për t’i marrë jetën djalit të tij, B.A., 29 vjeç.

Në vendin e ngjarjes kanë dalë ekipet përkatëse policore dhe Prokurori i Shtetit. Autoritetet kanë ndërmarrë veprimet hetimore për të zbardhur rrethanat e ngjarjes, ndërsa është kryer edhe kontroll në shtëpinë e të dyshuarit.

Gjatë kontrollit dhe ekzaminimit të vendit të ngjarjes janë sekuestruar tri pushkë gjuetie. Prokuroria bëri të ditur se armët kishin leje me afat të skaduar.

Pas kryerjes së veprës së dyshuar, 53-vjeçari është larguar nga vendi i ngjarjes dhe vazhdon të jetë në arrati. Prokurori i Shtetit ka lëshuar urdhëresë për autopsinë e trupit të viktimës.

Sipas njoftimit të Prokurorisë, as i dyshuari dhe as viktima nuk kanë pasur të kaluar kriminale. Po ashtu, nuk rezulton të kenë pasur raste të raportuara për dhunë në familje.

Prokuroria Themelore në Gjilan dhe Policia e Kosovës po vazhdojnë veprimet hetimore për të sqaruar plotësisht rrethanat dhe për të ndriçuar rastin.