Turizmi dimëror në Zvicër rrezikon humbje vjetore mbi dy miliardë franga

Zvicra mund të përballet me humbje vjetore mbi dy miliardë franga në turizmin dimëror deri më 2060. Studimi paralajmëron se vendpushimet e skive në lartësi më të ulëta mund të mbyllen, ndërsa bujqësia dhe hidroenergjia kanë mundësi të përshtaten me investime të synuara.

Turizmi dimëror në Zvicër mund të pësojë humbje vjetore prej më shumë se dy miliardë frangash deri në vitin 2060, ndërsa vendpushimet e skive në lartësi më të ulëta rrezikojnë të mbyllen për shkak të mungesës së borës. Këto janë disa nga përfundimet e një studimi të porositur nga Qeveria Federale e Zvicrës, i cili shqyrton ndikimet ekonomike të ndryshimeve klimatike dhe mundësitë për t’u përshtatur me to.

Analiza vlerëson tri skenarë: vazhdimin e zbatimit të masave për mbrojtjen e klimës, marrjen e masave të moderuara dhe një rritje pothuajse të pakontrolluar të temperaturave. Në secilin prej tyre janë shqyrtuar pesë rreziqe kryesore, mes tyre valët e të nxehtit, thatësirat, ndryshimi i vijës së borës, reshjet intensive, stuhitë dhe breshëri.

Raphael Bucher, drejtor i politikave klimatike në Zyrën Federale për Mjedisin, ka paralajmëruar se studimi nuk përfshin të gjitha pasojat e mundshme. Sipas tij, rreziqet mund të përforcojnë njëri-tjetrin dhe ndërvarësitë mes tyre nuk janë modeluar, ndaj kostot e përgjithshme mund të jenë dukshëm më të larta se ato të llogaritura.

Turizmi dhe bujqësia përballë ndryshimeve

Vendpushimet në lartësi rreth 1.500 deri në 1.800 metra, veçanërisht ato më të ulëta, pritet të përballen me mungesë gjithnjë e më të madhe të borës. Bucher tha se disa prej tyre mund të detyrohen të mbyllen edhe në skenarin më të favorshëm të studiuar. Qendrat më të larta mund të tërheqin një pjesë të vizitorëve, por kjo do të kërkonte investime, përfshirë stabilizimin e infrastrukturës së hekurudhave malore dhe sisteme për prodhimin artificial të borës.

Për bujqësinë, studimi paraqet një tablo më pak negative: dëmet ekonomike mund të kufizohen nëse investohet mjaftueshëm në ujitje. Kjo varet nga disponueshmëria e ujit, sidomos gjatë thatësirave, të cilat pritet të bëhen më të shpeshta. Bucher vlerësoi se sektori mund të përshtatet pa humbje të mëdha ekonomike nëse ka ujë të mjaftueshëm dhe zbatohen masa të përshtatshme.

Hidroenergjia mund të përfitojë

Ndryshimi i modeleve të reshjeve mund t’i sjellë përfitime të kufizuara hidroenergjisë. Skenarët parashikojnë më pak borë dhe më shumë shi gjatë dimrit, si dhe periudha të thata më të shpeshta, veçanërisht në verë. Megjithatë, studimi parashikon një rritje të lehtë të prodhimit të energjisë elektrike nga hidrocentralet.

Operatorët do të duhet gjithashtu të investojnë në infrastrukturë dhe në masa për t’u përballur me reshjet intensive. Përfundimi i përgjithshëm i analizës është se përshtatja mund t’i kufizojë dëmet në disa sektorë, por nuk mund t’i shmangë të gjitha pasojat ekonomike të ndryshimeve klimatike.