Vdes drejtuesi i veturës së hedhur në erë në Gjirokastër

48-vjeçari Beqir Devolli ka humbur jetën gjatë transportimit drejt Tiranës, pas plagëve të marra nga shpërthimi i një automjeti në Gjirokastër. Pasagjeri 26-vjeçar është jashtë rrezikut për jetën, ndërsa hetimet për ngjarjen po vazhdojnë.

Beqir Devolli, 48 vjeç, ka vdekur gjatë transportimit drejt Tiranës, pasi u plagos rëndë nga shpërthimi i tritolit në automjetin e tij në Gjirokastër. Pasagjeri që ndodhej me të në makinë ka mbetur i lënduar, por është jashtë rrezikut për jetën.

Sipas njoftimit të Policisë shqiptare, Devolli ishte drejtuesi i automjetit tip “Mercedes-Benz”, i cili shpërtheu në lëvizje mbrëmjen e së shtunës. Ai u dërgua për trajtim drejt Tiranës, por ndërroi jetë gjatë transportimit.

Pasagjeri, Erigers Mela, 26 vjeç, po trajtohet në spital. Policia ka bërë të ditur se gjendja e tij nuk paraqet rrezik për jetën.

Hetimet për shpërthimin

Dyshohet se në automjet ishte vendosur lëndë plasëse, e cila shkaktoi shpërthimin. Grupi hetimor po punon për dokumentimin ligjor të rastit dhe për identifikimin e kapjen e personit ose personave të dyshuar.

Devolli njihej edhe me nofkën “Çilo Hundëderri”. Në materialin e publikuar thuhet se ai dyshohej për lidhje me trafikun e drogës në Greqi.